قاتار-قاتار اولوب قالخیب هاوایا

نه چیخیبسیز آسمانا دورنالار

غریب-غریب، غمگین-غمگین اؤترسیز

اوءز توتوبسوز نه مکانا دورنالار

 

تسبیح کیمی قاتارینیز دوءزرسیز

هاوالانیب عرش اوءزونده سوءزرسیز

گاه اولور کی، دانه-خورش گزرسیز

گاه دوءشرسیز پریشانا دورنالار

 

عرض ائیله ییم، بو، سؤزومون ساغی دیر

یوللارینیز حرامی دیر یاغی دیر

شاهین-شونقار سوءربه نیزی داغیدیر

بویانارسیز قیزیل قانا دورنالار

 

ازل باشدان بصره، باغداد ائلینیز

بگلر اوءچون ارمغاندیر تئلینیز

اوخودوقجا شیرین-شیرین دیلینیز

باغریم اولور شانا-شانا دورنالار

 

بیر باش چکین دردمندین حالینا

عرضه یازسین، قلم آلسین الینه

ودادی خسته دن باغداد ائلینه

سیز یئتیرین بیر نشانا دورنالار